SIKLONE

lo van siklone la pli
gro dézord lo van
gro pléré lo syèl
antann lo van la pli akokiyé tèrla Mada
dann in kwin  mon kaz bwa-sou-tol
akokiyé sanm mon fanm mon zanfan
inn tann ankor
antann boukan lo van la pli déor
konprann déor pou rant anndan
konprann byinto nora pi
la born rant déor é anndan
nora riyink déor
antann bourant lo van
sagay do lo
pou batbat si lo twa la tol mon kaz
byinto déor anndan
dézord mon kèr pou bat a kasé
pli for lo van la pli déor ankor
mon fanm pou priy bondyé
kèl bondyé ? ousa li lé ?
mon zanfan pou pléré
lo ti tann sirtou
nout tout akokiyé byin séré inn sanmlot
dann in kwin la kaz ma la gingn protézé
pou anpar nout kor lo zyé la mor
déor anndan astèr
la pi la tol si lo twa la kaz
si bonpé lo twa Mada
lo twa bann maléré
touzour bann maléré pou gingn lo kou
bondyé i wa pa klèr
li wa èk lo zyé siklone

astèr siklone la fané
i rèst bonpé zabitan Mada
zot zyé pou pléré
soman la pwin lo tan pléré
i fo sèy sort dann malizé
ziska in not malèr i pwint son zyé