La saga de la nature !

Voilà ! C'est dit ! Asteur mi sava écrire...

En l'air la bas, navé un chicot d'bois l'était la depu tellement lontan que lu té croit alu le roi. Lu té y pousse, té y pousse et té y écrase tout. Tout le band zoizeau té y passe loin. Tuit-tuit la fini chapé, zoizeau la vierge té y fait pu désorde... merle péï la court cachette et nout tit tangue té y sort pu ! Même Le papangue té y passe loin... y restait juste un deux merles maurice pou fait l'intéressant...

Zanimo y gagne chapé loin mais le reste... y sava pa loin ? In tit plant fougère courageux la parti voir le chicot d'bois et la dire a lu : "A koze vi fait tout ça, nou aussi nou lé là ?"

Oté ! Ti plant fougère la gagne un causement... té y tremble pou rente son kaze. Son camarade, in pied de brande fier la console a lu et la dit : "Ma alé voir alu moin !"

Le pied de brande la arrivé et la dit : "A ou, chicot d'bois mon kamarade fougère té y mérite pas sak ou la dit !"... Imagine a ou, un tit pied de brande devant un chicot d'bois... Lu aussi la gagne un causement en kouillon que la fait cour a lu !

Du coup, tout la forêt té au courant chicot d'bois là navé mauvais caractère. Un bel bois de rempart la sort la bas et la dit : "Nou va voir kissa y commande aterla !"

Quand lu la arrive devant le chicot d'bois, lu pas eu le temps de causer, le chicot la tousse un coup et nout bois de rempart la gagne une volée de branches... Navé tout sort qualité de branches : zacacias, raison marron, goyave péï, goyaves de france, bois de couleur et sans couleur...

Le pauv bois de rempart la retourne dans son coin.

En l'air la bas, en bas la bas, dan cirques et remparts... y parait que la forêt lé en réunion...