Ou s'ra in homme mon fils

Si ou gaigne regard’ casser tout’ ça qu’ou l’a fait dan’ out vie
Sans dis rien, ou arcommence fait tout’
Si d’in seul coup, ou perd’ tout’ l’argent ou l’a gagné
Sans bougé, sans largue in soupir
Si ou pé et’ in bon z’amant sans qu’l’amour y rend’ a ou fou
Si ou pé et’ costaud en restant in pé doux
Si ou sent tout’ moun’ y aime pas ou, sans fait comme zot out tour
Mais ou continié sobat’ pou défend’ à ou

Si ou pé support’ écoute out causement
Çaqu’ mauvais lang’ y déforme pou enrage ça qu’lé bête
Zot bouch’ y raconte n’importe quoué su ou
Sans qu’ou ramasse menter, même dans out tête
Si ou pé rest’ droite même si ou lé popilaire
Si ou pé rest’ ti colon qui donne conseil lo roi
Si ou pé aim’ out band’ z’amis comm’ out band frères
Même si zot lé rien pou ou

Si ou connaît réflésir, argarder, et connaît’
Sans qu’jamais ou devient méfiant ou bien casser’
Rêver, sans laisse out rêve dev’nir out maît’
Penser, sans qu’ou lé in penser’
Si ou pé et’ dur sans qu’la raz y mont’ si ou
Si ou la pas per et si ou fait attention sirtout
Si ou pé et’ bon, si ou connaît rest’ pénard
Sans qu’ou lé in donner d’leçon, ni vantard

Si ou pé rencont’ victoire après défaite
Et argarde dan’ z’yeux dé menter’ là en même temps
Si ou pé garde out couraz et tout’ out tête
Pendant qu’les zot y perd’ ça d’zot bêt’ment
Alors le band’ roi, le band’ bondié, la chance ec la vitoire
Tout’ va serv’ à ou comme z’esclaves
Et ça qui vaut mié qu’band’ rois ec la gloire
Ou s’ra in homme mon garçon.

Poème de R. KIPLING traduit en créole
(Tu seras un homme mon fils)
Par Claude VINH SAN