Maloya lé pa malad

Maloya  sé mwin, Maloya sé ou, Maloya sé nou

Maloya la pa malad TIR SA.

Zansèt la ava’n an voulvoul Maloya anndan nou

Li lé inpalpab in pé konm nout la’m

Dan nout sèr, nout konpronir é nout kèr

Li konpoz lo limonn nout lèt o monn

TIR SA

Anouminm bann gardyinn lo tanp Maloya la

Akoz li sé nout péi, nout la’m, nout vibrasyon

Li sé lalibèrté, nout libèrté sérman péyé

Li la tir anou dann fénwar po aminn po nou laklarté

TIR SA. Pangar  na lèv angèp é zot va santi nout largiyon

Na difiz dann zot sistinm tou nout pwazon.

Non, i anfèrm pa li dann béton dann boutèy

Ni minm dann  somiz ou dann in dosyé

Non ! Ni vé pa, li arèt lopital, va rann ali mavouz

Nou la domann zantiman, ou la tourn anou an bourik

Astèr nou domann pi nou ègziz

Kontan pa kontan po nou lé parèy

TIR SA

Twé la sèy palank anou dan la koz zak,

Po giny myé  tinn nout mémwar

Twé na lo kilo dir sé po lo byinn Maloya

Fini lo tank sé ou i koné ousa ilé nout byin

Lo ti marmay la grandi la nni mazèr i fé pi pami’n

Astèr li koné kosa lé bon po démavouz son vi

TIR SA

Wi Séga Maloya po nou tinn térapi

Soman sé nou ki manyè la pa ou, asé ravaz

Arant ton gro zabo don diénizo

TIRSA

Christophe Barret