Kosa la fé lot patrimwann la?

korék, valab, gadyanm, tro bél, tro souét la rényon finn klasé patrimwann mondial l'unesco.
té kosasa? sa in zafér i manz sa? lé vré nout tout kréyol ou kiswa dot kalité domounn i viv isi, fo nou lé kontan.
i wa byin an sé moman, tout zournal, radio, domounn dann somin i koz sa mém! nou bat la min, nou di bravo!
mé ét kontan sé in zafér, wa si i sérv sé innot!

boudoudoup, boudoudoup, boudoudoup... sa pa loson in maloya sa?
si mi tromp pa, na pwin sitantélman lontan dsa maloya té pa klasé "patrimwann mondial l'unesco"?
mi krwa byin ké wi! mé dann tousa kosa la avans ali... éské nou wa zordi la planét antyé i dans maloya, oubyin ban gran disjoké la romix in maloya, éské solman dann finfon la frans toute domounn i koné kosa ilé maloya? nou lé fransé non???
la réalité sé ké mém kréol la rényon la ont ékout maloya (pourtan lé klasé l'unesco!!).
konbyin loto "sono mobil" i pas ék maloya a fon?
konbyin kréol ou trouv dann in konsér danyél waro? konbyin tan bann radio lokal i difis maloya par zour?
isi domoun i kri for la kiltir mé i ékout dancehall, rnb ék zouk
tousa pou di azot ké pou maloya mi trouv lo klasman l'unesco la pa ansérv gran soz, mi éspér sora otroman pou klasman piton, cirk ék ranpar... fo éspéré nou tonm pa dannfon ranpar
ankor bravo pou lo ti volkan, lavnir va di anou kél profondér ilé bann ranpar la!